Welkom op mien blog http://grunnegerbiebelgedichten.blogspot.com
Noast de Grunneger Biebel is er misschain ook vroag noar Grunneger gedichten over biebeldailen of geleufsgedichten.
De gedichten dai joe hier lezen mag je met vermelden van mien noam ook bruken veur joen liturgie, kerkblad of zukswat.
Ain van mien bouken is ien t Grunnens schreven. Dat is t bouk Grunneger Biebelgedichten. Dit bouk (12,95) ken je ook bestellen via 06 20182396 of via cobytjeert@live.nl Den huif je gain portokosten betoalen. (Aal mien bouken, 13 stuks, bennen bie bestelmijnboek.nl en bol.com te koop en te lain ien biebeltaik van stad.)
Mocht u de Nederlandse vertaling zoeken van deze gedichten, die kunt u vinden op http://schriftgedichten.blogspot.com/
Ik hoop dat elk zich hier thuus vuilt en wens joe n baarg leesplezaaier. Vrundeleke groet van Coby Poelman-Duisterwinkel.

vrijdag 8 maart 2024

Jeruzalemgangers



Met Jezus op pad noar Jeruzalem,

Nijsbrengers veuraan

mor Jezus heurt ook aargernis

van mensen achter Hom,

Hai wiest ze trecht

mor t moakt Hom nait veul uut

wat mensen van Hom vienden.

Hai het n opdracht

en doar gaait der veur,

gainain ken Hom

van Voaders roup weerhollen.

Niks is van meer belang

den wat Hom wacht.


Hai wait, noa lieden en staarven is meer,

Zien opstoan, hemelvoart

Gods geest op t pinksterfeest.


Wat ien de wereld ook aan onrust is,

hou mensen ook reageren, 

Zien gaang is zunnekloar.

Hai gaait der veur 

en ien dat licht

is alle onrust aans.


Wie bennen met Hom op pad 

noar t nij Jeruzalem,

as nijsbrengers van Hom

lopen wie ien Zien licht,

wat achter ons gebeurt,

is nait meer van belang,

belangriek is Zien gang!


Coby Poelman-Duisterwinkel

dinsdag 13 september 2022

Zunneblommen



Kiek Heer, zo mooi, Joen blommen,

ze gruien noar Joen licht,

heur zoaddroagende haarten

haildaal op Joe richt.


Loaten Joe mie noar heur kieken

met ogen van Joen Geest

om stil te ondervienden

wat men ien blommen leest?


Joe openen mie de ogen

veur dizze scheppenspracht,

Joen licht vörmt om mien binnenste

de stroalen van Joen kracht.


Coby Poelman-Duisterwinkel

maandag 12 september 2022

As t met Joe mor goud is


Sums ben k mistroosteg, nait zo voak,
mor der gait zoveul mis.
Den kom ik stil bie Joe Heer,
Joe waiten wel wat er is.

Joa, der is overaal wel wat
en naargens is t zoas t heurt
mor t gait je sums zo aan t haart
as der zoveul gebeurt.

Heer, as t met Joe mor goud is,
Joe bennen mien touverloat,
Joe waiten wel dat t op oarde
nait altied hemels goat.

Coby Poelman-Duisterwinkel

donderdag 20 juni 2019

Komst ook boeten?


Kom, loop weer es een rondje
en zwaai dien aarms zwiereg lös,
kiek es noar aal die vogels,
ben ze nait prachteg uutdöst?
Zuik es n keer een schelpkespad,
verwonder die om wastoe zugst
asofst veur t eerst noar boeten magst
en as n kiend kiekst noar een mug.
Zo wordt aal t grieze kleureg
en elke dag weer aans,
wordst zulf ook weer wat fleureg,
gun die zo’n boetenkaans.  

Kom, roupt het middagzunnetje
en zwaai dien aarms ien de moat,
geniet mor es, ik gun het je,
wacht nait totdat ik ondergoa,
geen sportschaul ken der tegenop,
kriegst lopende energie,
zo lopst die lös van elk getob,
kom, gun die zo’n traktoatie!
Zwaai onderwegens noar die vrouw
achter heur orchideeën
of noar de buurman met zien hond,
komst al wat op ideeën?

Loat die toch noar boeten trommen
ook as het weer wat graauw is,
zo lekker om weer thuus te kommen,
veuraal as het heul kold is,
en alles liekt veul minder zwoar
den houst het achterlaitst
een wandeling per dag verlicht
ook nog es stil verdrait.
En loopst toch laiver nait allain,
zuik wat vertraauwd gezelschap,
kiek onderwegens, zugst al ain,
wel kruust al joarenlaang dien pad?

Coby Poelman - Duisterwinkel

zondag 5 mei 2019

Ik ben Dai Ik ben



As Joe met ons bennen,
alle doagen,
en zegd hemmen
Ik ben dai Ik ben
en zel weden
wel Ik weden zel,

as Joe ien Joen Woord
ons zoveul kracht
geven tot geloven,

wel zol den
ons braandend haart
nog doven?
 
Bie Exodus 3 : 13, 14

Coby Poelman-Duisterwinkel


Uut de bundel 'Grunneger Biebelgedichten'

Foto is nomen vanuut kerkje van Fransum